Տ. Շահե Ծայրագույն վարդապետ Անանյան, ծն. 01/10/1982, Կոտայքի մարզի Նոր Հաճն քաղաքում։

1989-1999 թթ. ուսանել և գերազանց առաջադիմությամբ (ոսկե մեդալով) ավարտել է տեղի թիվ 1 ռուսական թեքումով միջնակարգ դպրոցը։

1999-2003 թթ. ուսանել է նախ Սևանի Վազգենյան դպրանոցում, ապա 2003-2005 թթ. ուսանել և ավարտել է Ս. Էջմիածնի Գևորգյան հոգևոր ճեմարանը, իբրև ավարտաճառ պաշտպանելով «Անդեմ նախադասությունները չորս Ավետարաններում. Գրաբար և հունարեն բնագրեր» խորագրով ուսումնասիրությունը։

2006 թ. Գարեգին Բ Ամենայն Հայոց կաթողիկոսի օրհնությամբ իր ուսումնառությունը շարունակել է Փարիզի կաթոլիկ համալսարանում և Սորբոնի Արևելագիտության դպրոցում, մասնագիտանալով հինկտակարանյան մեկնության և աստվածաբանության մեջ և 2010 թ. թեկնածուական ատենախոսության պաշտպանությունից հետո ստացել աստվածաբանության թեկնածու-լիցենցիատ կոչումը։

2013 թ. Անհրաժեշտ քննությունից և ատենախոսության պաշտպանությունից հետո ստացել է վարդապետի աստիճան։

2016 թ. Պաշտպանել է ատենախոսություն ծայրագույն վարդապետի աստիճանի համար, և նույն տարում Երևանի պետական համալսարանի Փիլիսոփայության և հոգեբանության ֆակուլտետում 2012-2016 թթ. Ասպիրանտուրայում  ուսանելուց և ատենախոսության պաշտպանությունից հետո ստացել փիլիսոփայական գիտությունների թեկնածուի գիտական աստիճան։

2005 թ. Ձեռամբ Նոր Նախիջևանի և Ռուսաստանի հայոց թեմի առաջնորդ Տ. Եզրաս արքեպիսկոպոս Ներսիսյանի ձեռնադրվել է սարկավագ, իսկ 2006 թ. Ձեռամբ Տ. Տարոն եպիսկոպոս Ճերեճյանի, աբեղա։

2006-2019 թթ. Մայր Աթոռ Սուրբ Էջմիածնում ծառայել է նախ որպես Գարեգին Բ Ամենայն Հայոց կաթողիկոսի գավազանակիր, ապա Պաշտոնական մամուլի և Հրատարակչական բաժնի տնօրեն։ Ներկայումս Միջեկեղեցական հարաբերությունների բաժնի տնօրենն է։ 2009 թվականից դասավանդել և դասավանդում է Գևորգյան հոգևոր-աստվածաբանական ճեմարան-համալսարանում, Երևանի Վ. Բրյուսովի անվան լեզվաբանական պետական համալսարանում, Երևանի Գեղարվեստի պետական ակադեմիայում։

Հեղինակ է չորս մենագրության և շուրջ վեց տասնյակ գիտական և հրապարակախոսական հոդվածների։